Mapa zertan den
Mapa hau Baldomero de Blas ingeniari eta geografoak marraztu zuen Madrilen, 1950ko apirilean, Soraluzeko Udalaren aginduz, segururena.
Mapak erakusten du udalerria nolakoa zen, batez ere, herrigunea. Luzeeran, Igaratetik Salon-azpirainoko eremua barnebiltzen du (1.700 bat metro), eta zabaleran, ibaiaren bi aldeak (200-400 metro).
Berez, mapa argitarabea da, tipula-paperean egindakoa. Kopiak banan banan ateratzen zituzte, premia zegoenean.
Mapak 1:1000 eskala erabiltzen du, eta sestra-kurbak metrotik metrora daude marraztuta.
Mapan agertzen direnak eta falta direnak
Mapa hau oso garrantzitsua da jakiteko nolakoa zen Soraluzeko urbanismoa desarrollismoaren aurretik.
Orduko enpresa asko eta asko agertzen dira mapan: Alberdi, Amuchastegui, Aranguren, Arizaga, Barrenechea, Gol, Lete, Oruesagasti, Sacia, Ucin… Gerora, lantegi horietako gehienak bota egin ziren.
Gaur egun desagertu diren hainbat eraikin ere agertzen dira: Erregetxea, Fabrika zaharra, Santa Ana komentua, Gayarre antzokia, Soraluce zinema, Zuzendariaren etxea, Malmero errota edo zentrala, zubi nagusi zaharra, aspaldiko zahar-etxea, Txurrukeneko bolbora-etxea, trenbidea eta geltokia, maristen ikastetxea...
Ostera, falta dira 1950. urtetik aurrera egindako auzo eta etxebizitza berriak: 1950eko hamarkadan Gabolats (iturri inguruan), Alejandro Calonge eta Serafin Achotegi, Sagar-erreka, Arraikua eta Loralde; 1960ko hamarkadan Gabolats garaia, Ezozibidea eta Zeleta; 1970eko hamarkadan Estaziño kalea, Errekalde bukaera, Gipuzkoa Etorbidea eta Santa Ana komentuaren lurretan eraikitako etxeak.
Bitxikeriak
Mapan agertzen diren lursailak jabe-izenen bidez identifikatzen dira, garai hartako grafiak: Erregueche, Seleta...
Mapa eskuratzeko
Maparen hiru bertsio daude eskura: jpg (2,5 Mb), jpg (40 Mb) eta pdf (102 Mb). Nahikoa da Sorapediako Biltegi digitalean sartu eta bertatik deskargatzea.