Zibersexismoa

Erabiltzailearen aurpegia

Maitasunean eta gerran denak balio duela entzun izan dugu sarri. Ez naiz hasiko esaldi honen zilegitasuna eztabaidatzen. Baina duela gutxi irakurritako zerbaitek gogora ekarri zidan esaldi hori. Stop Fisha elkarte feministak aditzera eman duenez, eduki pornografikoa erabiltzen dutenen artean, neska ukrainiarren bilaketak izugarri hazi dira azkenaldian. Pornozale horiek bilatzen ari direna, beste behin, emakume gazte (eta seguruenez ume) ahulenak, defenda ezinenak eta bortxatzeko errazenak dira.

Intimitate sakonenean ere, bakarka masturbatzerakoan, fantasia nazkagarrienekin kitzikatzen den gizarteko zati honekin partekatzen dugu bizitza, lana, ikasketak, aisialdia, eta agian ohea ere. Irudimenean bada ere, bortxatzaileak diren horiekin. Zibersexismoa heteropatriarkatuaren beste tentakuluetako bat da; ezin dugu gutxietsi, batez ere, gazteenek hau kontsumitzerakoan sortzen diren errealitatearekiko paralelismoak nahastera eramaten baitituzte. Izan ere, azken urteetan bideo pornografikoetako biolentzia imitatu ohi dituzten jokabideak asko hazi dira. Zerk kitzikatzen gaituen ere politikoa da, batez ere atzean arma eta drogen mailan dagoen pornoaren industria matxista badago, fantasia ilun eta nazkagarrienak gure etxe eta erretinetan sartzeko prest.