Dena aldatzen da

Erabiltzailearen aurpegia Gaizka Azkarate 2023ko mai. 1a, 15:41

"Aldatzen da azalekoa eta mina ere aldatzen da…” horrela dio Miren Amurizak 2017an Berria-ko zutaberako euskaratu zuen kantuak. Iaz Ines Osinagak musikatu zuen eta lau haizetara zabaldu dira hitzak zein doinua (entzungai sarean). Mercedes Sosak kantatzen zuen gazteleraz eta Julio Numhauserrenak dira hitzak, Pinocheten garaian Suediara erbesteratutako konpositorearenak.

Aldaketa prozesu batean jaiotzen gara, sarri horren kontzientzia izan gabe eta ia beti eraldatze horrek gure bizitzetan izango duen garrantziaz ohartu gabe. Egoera sozio-ekonomiko konkretu batean jaio eta azal kolore jakin baten jabe; zenbat pribilegio?

Familia giroa halakoa eta jasotako baloreak horrelakoak.

Ez da berdina 60ko hamarkadan jaio izana, 90ekoan edo 2000. urtetik aurrera.

Aldaketarako prest egotea garrantzitsua da eta aldaketara eramango gaituen hari mutur horri tira egiteko motibazioa izatea. Haria formaz aldatzen da, baina ez da eteten. Ikusi, ikasi, entzun, onartu, irakurri, hanka sartu…aldatu.

Tarteka gure iritzi berdina ez duen norbait jartzen zaigu mahaiaren beste aldean. Adi entzun, esateko duena aldaketa prozesuan lagungarri izan daiteke.