Soraluzeko EAJ-PNVk Plaentxi Herri Ikastetxean irisgarritasun lanen amaiera ospatzen du

Eusko Jaurlaritzako Industria Sailak igogailua martxan jartzeko baimenaren zain, Soraluzeko EAJ-PNV pozik dago Plaentxi Herri Ikastetxean irisgarritasuna hobetzeko lanak amaitu direlako. Proiektu hori aurreko legealdian bultzatu zen, eraikinaren erabiltzaile guztientzat segurtasuna eta sarbide berdintasuna bermatzeko.
Eusko Jaurlaritzako Hezkuntza Sailak egindako lanei esker, ikastetxeak zituen irisgarritasun-arazoak konpondu eta instalazioak nabarmen hobetu ahal izan dira. Egindako jarduketen artean, honako hauek nabarmentzen dira: igogailu panoramiko bat jartzea, sarbide nagusia osorik berritzea eta jantokiaren eremuan barruko eskailera berri bat sortzea, estalitako patioa sotoarekin zuzenean lotzeko.
“Eraikinaren irisgarritasuna bermatzeko ikastetxeko zuzendaritzarekin eta Eusko Jaurlaritzako Hezkuntza Sailarekin batera diseinatzen dugun proiektua hezkuntza-komunitate osoaren zerbitzura dagoen errealitatea da gaur egun”, adierazi du Iker Aldazabal Soraluzeko bozeramaile jeltzaleak.
Udal talde jeltzaleak azpimarratu duenez, jarduera honek duela urte batzuk antzemandako behar bati erantzuten dio, eta EAJ-PNVk hezkuntza inklusibo eta seguruarekin duen konpromisoa islatzen du.
“Gure helburua beti izan da Soraluzeko haurren eta ikastetxeko hezkuntza komunitatea osatzen duten familien egunerokoa hobetzea. Irisgarritasunean egindako inbertsioak ez dira luxu bat, justizia eta ongizate kontua baizik ”, gaineratu du Aldazabalek.
Obrak Eusko Jaurlaritzako Hezkuntza Sailak finantzatu ditu oso-osorik, 777.000 euro inguruko inbertsioarekin, eta obrak amaitzeak eraikinak egungo segurtasun, irisgarritasun eta funtzionaltasun estandarrak betetzea ahalbidetzen du.