Errastiren heriotzarekin, "erreferente bat" galdu du Bergarak

Bergarako San Pedro eliza txiki geratu zen uztailaren 14an Juan Mari Errasti Lesarriri –Eibarren jaio zen 1925an eta Bergaran hil zen uztailaren 12an– azken agurra emateko. Alkartu Nai elkartearen hasierako urteetan, 1960ko hamarkadaren erdialdean, ezinbesteko pieza izan zen Errasti, eta aurrerago hamaika saltsatan ibili zen. "Alturaz txikia bazen ere, gizon handia zen; plazera zen haren ondoan lan egitea. Bergarak erreferente bat galdu du, haren lana eta nortasuna ez ditugu ahaztuko", dio Errastirekin harreman estua izan zuen Juanjo Arrietak.