Irailaren 28an, ipuinez beteko dira Plazentziako kaleak. Herriguneko hainbat txokotan ipuin-kontaketak egingo dira hainbat hizkuntzatan, hala nola, arabieraz, gazteleraz, azeri hizkuntzaz, katalanez eta euskaraz. Eta kontaketez gain, liburu-azoka eta liburutegi txokoa ezarriko dute, eta ipuin-bazkaria ere egingo dute Arriogain elkartean.
Eguna Pil-pilean Euskaltzaleen Elkarteak, udaleko Kultura Sailak eta liburutegiak antolatu dute eta munduko hizkuntzak eta kulturak ezagutaraziz soraluzetarren artean harreman-sareak indartzea du helburu.
Ipuin gehiago urtean zehar
Munduko ipuinen eguna ez da, ordea, egun bakarreko kontua izango. Urtean zehar, ipuinen inguruko ekintza gehiago egingo dira, 'Mila eta hamaika ipuin - Munduko ipuinen ziklo herritarra' ekimenaren baitan.