Hiru hilabete baino gutxiago pasa dira 2019a hasi zenetik eta jadanik hori guztia pasatu da gure herrian, Plaentxin.
Eta oraindik M8ko greba zergatik egiten dugun galdetzen dute. Galdera hori egiten digun jende gehienak, beste aldera begiratzen du aipaturiko kasu bat bere begien aurrean gertatzen bada.
Eskerrak Plaentxiko mugimendu feministatik argi izpiak ere ikusten ditugun antolatzen ditugun mobilizazio jendetsuetan, bere babesa ematen digun herritarrengan, eta ,batez ere, M8a antolatzeko sortu den 20 emakume inguruko plataforma potentean.
Eta zure ustez, ba al dago arrazoirik greba egiteko? Edo aurten ere etxean geldituko zara?
Tratu txarren bi salaketa; hizkuntz irakasle batek ikasle feminista bati histerika deituta beste ikaskideen aurrean umilatzea; erasotzaile matxista batek mugimendu feministako bi kideri denuntzia jartzea; ginekologoa aho-zabalik geratzea pazienteak harreman homosexualak dituelako; tabernetan eta dendetan erasotzaile eta jazartzaile matxistak onartzea.