Normaltasuna?

Erabiltzailearen aurpegia

Badira hilabete batzuk berrogeialdia amaitu zela, badira hilabete batzuk normaltasuna itzultzen ari dela...edo ez? Pandemiaren iraupena motza izango zela uste genuen eta hala uste ez zutenek ez zuten hainbeste luzatzerik espero. COVID-19a agertu zenetik, normaltasunari buruz hainbat teoria entzun ditugu, batzuk ideia batzuekin konbentzituta, beste batzuk ez hainbeste.

Normaltasuna, hitz bat, baina hainbat esanahi eman dizkiogu azken hilabeteotan. Askok diote bizipen hauek gizartea aldatuko dutela, jarrera aldatuko dugula. Ez dakit horrela izango den, baina badakit etorkizunari buruzko sasijakintsu bilakatu garela. Agian hori da normaltasunera itzultzeko modua. Normaltasuna itxaropenarekin lotuko nuke; gogoko dut gertukoekin pandemia aurreko egoeraren itxura duen eszenatokietara itzultzea, gogoko dut berriz muxuak eta besarkadak jaso eta ematea, baina beti egongo da kontrolatuko ez dugun hori. Bai, beldurra ematen du, baina hau da gure normaltasuna; dena gure kontrolpean ez izateak ez digu aurrera egiteko aukera kenduko. Ez dakit non bukatuko dugun, baina, beste behin, normaltasuna aurkitu beharko dugu, eta tira, hortik ere zerbait aterako dugu. Bitartean goza dezagun daukagunaz.