Whatsapp, bizitza?

Erabiltzailearen aurpegia

Ez daukat Whatsappik. Nire mugimenduak, ohiturak, nire kontaktuen sarea Marc Zuckerbergen inperioarekin partekatu nahi ez ditudalako. Hura aberasten lagundu ez dudalako nahi. Arrazoi beragatik, Facebook ere ez dut inoiz eduki eta ez dut izango. Facebook ez izatearren arazoren bat izan dut, baina tira, kontua zabaltzeko beharrik ez dut inoiz sumatu. Watsapparena ezberdina da: inork gutxik ez du whatsappa eta batzuetan latzak dira watsapp taldeetan izena ez ematearen ondorioak. Txertoari uko egitearen pare, pentsatu nuen aurrekoan: Multinazional handienen presioaren aurrean zeure burua entregatu nahi ezagatik, entxufatzea onartu duen beste baten laguntzaz lortu behar dituzu gauzak. Senideak haserretzen zaizkizu, semearen pilota partidura ezin baitzara joan, futboleko txapelketara garraioa antolatzen parte hartzerik ez baituzu. Aita, arraroa zara, beste guztiek egiten dute, barren. Eta zeure kapritxoagatik ezin izan naiz beste guztiekin joan.

Bestalde, Whatsapp edo txertoari uko egitea ezin da konparatu. Euren produktuaren helmena ahalik eta gehien areagotzea da enpresa akziodunen asmo bakarra, hori bai, eta intsumisioa zigortu egiten da bi kasuetan, eguneroko jardueretara sarbidea murriztuz. Bi kasuetan, gaian aditua izan gabe, arriskuak eta desabantailak suma daitezke. Adituen arabera, aldiz, oso ezberdintzat jo behar dira bi intsumisio motak: Birologoen gehiengo handi batek txertoa gomendatu bitartean, Pfizer edo Modernaren soldatapean ez egonda ere, informatiko orok argituko dizkizu zeure bizitza munduko enpresa handienekin partekatzearen ondorioak, sektoreko enpresa handienen soldatapean ez badago, behintzat. Txertatzeko aginduaren aurrean zer egin erabakitzea zaila egiten zait horregatik, baina online kontuak non eduki nahi ditudan erabakitzea, eta non ez, erraza. Datuen subiranotasunaz eta pribatutasun digitalaz eztabaidatzen denaz jabetzen hasita, are errazago. Eta alternatiba hobeak badaudela jakinda, guztiz erraza, irabazi asmorik gabeko komunitateak kode irekian sortutako, pribatutasuna eta datuen burujabetza errespetatzen dituzten alternatibak, alegia. Twitter baino hobea da Mastodon, Facebook baino hobea Diaspora, eta Whatsapp baino hobea Signal. Pribatutasun eta funtzionalitate aldetik, Telegram ere hobea da Whatsapp baino, eta bitarteko soluzioa izan daiteke, Telegrameko jabearen enpresak burtsan kotizatu arte.

Burujabetza digitala aldarrikatzeari ez diot kontraindikaziorik ikusten. Hasteko: Whatsapp kentzea. Urrats txiki bat norberarentzat, pauso handi bat gizarterako. Futbol taldeek-eta whatsappa uzteko, masa kritika txikia baino ez gara izan behar. Apuntatzen?