Disimuluan hasten diren urritzen, elauntzen eta lizarren loreak ere laster batean agertu ziren eta udaberriari ofizialki hasiera ematerako, zuri-zuri, usaintsu eta erlez beterik zeuden gereziondoak. Egunetik egunera, orban berdexkak agertzen; haritzak, urkiak, madariondoak, urritzak... berdetzen, bakoitzak bere kolorea emanez paisaiari. Gure aurrean gertatzen ari da, egunero-egunero; bizitzaren urteroko ikus-entzun-usainkizuna, sentikizuna, bioaniztasuna handitu ahala ederragoa dena.
Berdin hizkuntzarekin ere: gutako bakoitzaren hizkuntzek, hizkerek, ahaleginek paisaia sonoro ederra osatzen dute egunero. Korrika euskaltzaleen loraldia eragiten ari da bazterrik bazter, hunkidurarik sakoneneko sentikizuna, aniztasunak ederragotzen duena.
Den-denon neurrira eginak bi-biak. Gozatu eta ondo zaintzekoak.