Areto txirrindularitzako saioetan, euskal musika gehiago erabiltzea lortu nahi da, eta bilduma honi esker, euskal musika erraz aurkitzeko aukera izango dute begiraleek. Soraluzeko kiroldegian hainbat talde euskaraz ari dira areto txirrindularitzan eta ezinbestekoa iruditzen zaie egitasmoaren bultzatzaileei euskal musikak ere hor bere tokia izatea.
Hasiera batean 250 abestirekin osatu dute bilduma baina aurrerantzean abesti berriak gehitzen joango dira. Halaber, formazio-topaketa bat eskainiko zaie bailarako kiroldegietako begiraleei, azaroaren 28an, Elgoibarko kiroldegian. Bertan, euskal musikaren bilduma aurkezteaz gain, areto txirrindularitzako saioetarako musika nahasteko baliabide informatikoak erabiltzen ikasteko aukera izango dute.