Harategi,
urdaitegi eta arrandegietako papera murriztu eta zabor gutxiago sortzeko helburuarekin,
Ontziratu Zaitez! Kanpaina abiatuko dute zapatuan Soraluze Zero Zabor,
Alkarrekin, Kutxa Ekogune eta udalak. Datozen asteotan plastokozko poltsen
ordez tuperraren erabilera sustatuko dute, etxetik eramanez edo bestela,
produktu hauek saltzen dituzten komertzioetan tuperrak erosiz (0,5 euroko
prezioan). Zehazki ondorengo komertzioak dira kanpainarekin bat egin dutenak:
Juan Mari arrandegia, Etxabe harategia, Iñarra harategia, Mari Mar harategia,
Javier Alberdi harategia, Aitziber urdaitegia, Erosle kooperatiba, Criado
frutategia, Bolintxo okindegia, Amparo autozerbitzua, Venan eta Montse
autozerbitzua, Vidal frutategia eta Salon denda. Herritarrei etxean izan ditzaketen
ontziak erabiltzeko deialdia egin badiete ere, kanpainarako diseinatutako tuperrak
zapatuan salgai jarriko dituzte 0,50 euroko prezioan, 10:00etatik 13:00ra Zubi
Nagusian jarriko den standean. Etxebizitza bakoitzeko ontzi berrerabilgarri bat
eskuratu ahal izango da.
EkoBira
azoka ibiltaria egun osoan zehar
Ontzi
berrerabilgarriak sustatu ez ezik, kontsumo ohituta jasangarriak sustatzea ere
bada Ingurumen Eguneko helburuetako bat. Hartara, EkoBira produktu ekologikoz
osatutako azoka bisitatzeko aukera izango da goizeko 10:00etatik 14:30 eta 16:30etik
19:30era bitartean. Besteak beste, elikagaiak, artisautza produktuak, garbikariak,
egurrezko jostailuak, berrerabiliz ekoiztu diren osagarri eta altzariak eta bidezko
merkataritzako produktuak kontsumitzeko aukera egongo da.
Tailerrak ume eta helduentzat
Zapatu arratsaldean
helduentzat xaboia, ukendu eta tinte naturalak egiten ikasteko tailerrak
eskainiko dituzte eta umeentzat, naturarekin loturiko jolasak eta ipuin
kontaketa saioa izango dira, Nerea Ariznabarretararen eskutik.
Kantu afaria, zero zabor filosofiaren baitan
Eguna
amaitzeko kantu-afaria egingo da Plaza Barrixan, zero zabor filosofia oinarri
hartuta. Arduradunek afalorduan “etxean erabiltzen den ontziteria” erabiliko
dute eta ondoren, afaltiarrak izango dira taldeka banatuta harrikoa egiteaz
arduratuko direnak. Festa borobiltzeko kantuan egingo dute, Domentx eta Benik
lagunduta. Afariko produktuak “ekologiokoak eta bailaran eskuratutakoak” direla
adierazi dute antolatzaileek eta tiketak, Iratxo, Arrano eta Gaztelupen daude
salgai, 14 eurotan helduenak, 12 ikasle eta langabeenak eta 6 eurotan umeenak
(6-12 urte).