Joan den asteaz
geroztik, Soraluzeko herritarrak txipa duten materia organikorako txartel
pertsonalizatuak jasotzen hasi dira eta lehen edukiontzi berriak ekainaren 3an jarriko
dituzte Loralde, Errekalde eta Baltegieta inguruetan,
ekainaren 4an herrigunean eta 5ean, Atxuri eta Sagarrerrekan. 23 edukiontzi
izango dira guztira, horietako 9ren edukiera 2.200 litro eta beste 14rena 1000
litro izango da.
Sistema berriarekin edukiontzia giltza bidez
ireki ordez txartel pertsonalizatuarekin irekiko da eta Txip sistema berriak
parte hartzaileen datuak
erregistratuko ditu. Horrela, materia organikoaren gaikako bilketan parte
hartzen duten herritarrak zein diren jakin ahal izango dute. Informazio hori
prozesatu egingo da, hain zuzen ere materia organikoaren gaikako bilketan
benetan parte hartzen duten pertsonei tasak ez igotzeko. Edukiontzien
erabilerari buruzko zalantzak argitzeko 900 103226 doako telefonoa jarri dute
martxan.
%70eko parte hartzea
Herriko 1245
familiek (%67,81) izena eman dute 5. edukiontzia erabiltzeko. 2013ko urriaz
geroztik ia 200 parte hartzaile gehiago daude eta gehikuntza horrek gaikako
bilketaren ehunekoan eragina izan du: 2013an %30,49 biltzen zen, 2014ko lehen
hiruhilekoan %36,19. 2014. urte bukaerarako gaikako bilketan %40a gainditzea
aurreikusten da eta 2016rako %60a.