{mosimage}
ABERRI EGUNERAKO DEIALDIA ETA
IKURRIÑAREN ALDARRIKAPENA
Soraluzeko EH Bildu osatzen dugun
alderdi eta herritarrok, Aberri Eguna dela eta, “Euskal Herria
eraiki ! Zazpiak bat ! “ lelopean, gure babesa adierazi nahi diegu
apirilaren 19an eta 20an Larresoron eta Iruñean egingo diren
ekitaldiei.
Erabakitzeko eskubidea eta
lurraldetasuna izango dira aurtengo Aberri Egunaren ardatzak. Euskal
Herriaren lurraldetasuna kontuan hartzeko beharra ezin da ezkutatu.
Ezin da etorkizuna eraiki eredu zaharkituen gainean eta gizartearen
gehiengoaren kontra. Bide horretan, ezkerreko proiektua beharrezkoa
da: ezker subiranista gara, ezker eraldatzailea eta ikuspuntu
horretatik jardun nahi dugu munduan, herri modura. Askapen
nazionalaren borroka askapen sozialaren borrokaren eskutik doalako.
Aurtengo Aberri Eguna une eta
testuinguru politiko, ekonomiko eta sozial “esanguratsuan”
ospatuko dugu; erabakitzeko eskubidearen eztabaida Europan nahiz
Euskal Herrian zabal zabalik dagoen momentuan hain zuzen. Oztopo
guztien gainetik, martxan dira prozesuak Eskozian eta Katalunian.
Espero bezala, estatu frantsesak eta espainolak Euskal Herrian sortu
den esperantza zapuzteko ahaleginetan jarraitzen dute. Gure aldetik,
arduraz jokatzeko eta akordio zabalak lortzeko garaia da.
Deialdi honekin batera, Euskal Herriko
udaletxeetan eta geurean ere bandera espainiarra jartzeko inposaketa
salatu nahi dugu. Herritarren gehiengoaren borondatearen kontra,
gehiengoak geuretzat sentitzen ez dugun bandera jartzera behartu nahi
gaituzte. Horren aurrean, Euskal Herria eta euskal herritarron
gehiengoa ordezkatzen duen bandera ikurrina da.
Soraluzetarroi, dei egiten dizuegu
balkoietan ikurriña jartzeko eta apirilaren 19an Larresoron eta 20an
Iruñean egingo diren Aberri ekitaldietara joateko.
Eraiki dezagun zazpi lurraldez
osatutako Euskal Herria, euskararen herria!
Soraluzen 2014ko apirilaren 11n.
Soraluzeko EH Bildu
Soraluzeko EH Bildu