Banarte Antzerki Taldeak “Guernica
1913” antzezlana taularatuko du zapatuan, 20:00etan Antzokian. XX. mende
hasieran Gernikan jazotako klase borrokari loturiko gertaera historikoa du lan
honek oinarri: Esperanza y
Uncetako (gerora ASTRA izango zena, Unceta y compañia, arma laburren
produkzioan enpresa garrantzitsua) langile eibartarrek 1913ko udazkenean
Gernikan egindako eta “bukaera epikoa” izan zuen greba.
Klase sozial berriaren sorrera eta bilakaera
Lehen fabrika, lehen greba,
lehen aldarrikapenak, maila-agintariari egindako lehen eskakizunak, lehen
protestak, elizaren eta fedearen izenean eta konbikzioan jarritako
autoritatearekiko lehen zalantzak… . Bata bestearekiko guztiz kontrakoak ziren
bi munduren elkarketa eta bi gizarte maila antagoniko nahastetik sortu zen
gizarte klase berria azaldu nahi dute. Egungo gizarteari buruzko gogoeta ere
bultzatu nahi du Banartek “balio eta borroka moldeen aldaketa, gure arbasoei
eraikitzea hainbeste kostatu zitzaien hura nola jausten doan” erakutsi nahi
dute.
Edu Pombar taulagainean
Gernikazarra historia
taldeko Txato Etxanizek jasotako informazioan oinarrituta, Rafa Hercek idatzi
eta Sardo Irisarri eibartarrak zuzendutako lana da “Guernica 1913”. Edu Pombar
aktore soraluzetarrak 2013. urtean bizi den Borja Gandarias gaztearen papera
betetzen du. Berarekin batera Begoña Garcia, Dolma Romera, Jon Urbano, Vanesa
Rodriguez eta Rafa Herce arituko dira taulagainean.
Antzerki Amateurraren Espainiako konfederazioaren saria
Antzerki Amateurraren Espainiako
konfederazioak antzerki garaikidearen atalean saritu berri du “Guernica 1913”
antzezlana. Urtarrilaren 31ko batzar orokorrean, aho batez erabaki zuten kideek
saria Banarteren lanari ematea. Azaroan Granadan egingo duten jaialdian jasoko
dute saria.