Mbayeren heriotzaren
ostean herrian sortu zen “elkartasun mugimendua gogoratu eta indar hori
kulturartekotasunaren gorazarre egitea” da elkartasun batzordearen eta Ndank
Ndank elkarteak elkarrekin antolatuko duten ekitaldiaren helburua. Horretarako,
musika eta janari senegaldarrak uztartuko dituen jaialdia prestatuko dute
antzokian. Otsailaren 7a da aukeratutako eguna, Mbayeren heriotzaren egunaren
bezpera. Antolatzaileek iazko ekimenetan euren hondar alea eskaini zuten
ehundaka soraluzetarrez gain, inguruan bizi diren senegaldarrak ere gonbidatuko
dituzte.Mbayeren senideek ere gogo onez hartu dute ekimena eta bertan izango
direla jakinarazi dute.
Jaialdia
Otsailaren 7ko jaialdia
arratsaldeko 20:00etan hasiko dute Mbayeren heriotzaren osteko mugimenduaren
inguruko datu eta irudi batzuk proiektatuz. Ondoren, kora -instrumentu
afrikarra- entzuteko aukera izango da Enekora taldeak eskainiko duen
kontzertuan. Taldea Eneko Larrañaga zestuarrak zuzentzen du beste hiru
musikariren laguntzarekin, eta Kora Izpiak izeneko diskoan jasotako
kantuak joko dituzte. Kantu batzuk eurak konposatutakoak dira eta beste batzuk
kantu tradizionalen bertsioak. Kantuotan euskara eta beste hizkuntzak nahasten
dituzte, eta bizitzaz, etorkinen sentimenduez, naturaz... berba egiten dute.
Antolatzaileen esanetan musika lasaia da, patxadaz entzutekoa. Gainera, Afrika
eta Hego Amerikan ateratako irudiak ere proiektatuko dituzte musika
emanaldian zehar.
Kontzertuaren ostean,
jaialdiari amaiera emateko, yassa, senegaldarren ohiko jakia,
dastatzeko aukera izango da antzokian bertan. Sarreran borondatea jasoko
dute ekitaldiaren antolaketak eragindako gastuak ordaintzeko.
{mosimage}
Familiari laguntza
hilero
Mbayren alargunari eta
hiru seme-alabei laguntzeko batu zen diruaren bidalketaren berri emateko ere
aprobetxatu nahi dute urteurrena batzordekoek. Hilero 300 euroko laguntza
bidaltzen dute Senegalera bankuen bitartez, alargunaren izenean dagoen kontura
eta bera da zuzenean laguntza hori jasotzen duena. Ndaye izeneko herrixkan bizi
diren berrogei senitartekoen oinarrizko beharrak asetzeko erabiltzen dute
dirua.