Ezozi Maitezgi, egoitzako langile eta LABko ordezkaria
{mosimage}
Zer da zehazki, Fundazio batzordearekin adostu duzuena?
Uztailean iraungitzen da
zaintza sektorearen hitzarmen kolektiboa. Espainiar Estatuak, Estatuko
egoitzetan indarrean dagoen itzarmena aplikatu nahi digu eta hitzarmen honek,
langileen lan-baldintzak zeharo okertzen ditu. Soldatetan 400 euroko jaitsiera
aplikatzeko asmoa dute eta lanaldia 200 orduz luzatzekoa. Lan gehiago, diru
gutxiagoren truke, eta hori ezin da onartu. Soraluzeko Fundazioarekin, herrialdeko hitzarmenik egon ezean, Estatuko hitzarmena ez
aplikatzea adostu dugu.
Borroka luze baten emaitza izan da akordioa lortzea.
Pozik?
Kalean dagoen borroka da oraindik zaintza sektorean hitzarmen
duina lortzea. Astelehenetik ELAkoak Greba mugagabean daude eta LABk ere Greba
egingo du maiatzaren 17, 24, 25, 29, 30 eta 31n. Soraluzen, zorte handia izan
dugu egoitzaren kudeaketa Fundazio baten eskumena delako, eta adostasun batera
heltzeko jarrera erakutsi dute hasieratik. Fundazio batzordearen bitartez Espainiako Estatuak ezarri nahi duen lan-erreforma
saihestu dugu eta gainera, Diputazioak eskainitako diru partida batekin, lan-baldintza
hobeen aldeko apustua egiteko proposamena onartu dute. Lasaiago eta
itxaropentsu gaude, baina herrialdeko hitzarmena lortzea da orain gure erronka.
Zergatik da hain garrantzitsua?
Gipuzkoako Foru Aldundiak zaintza sektorea indartu eta
langileen lan-baldintzak hobetzeko proposamenak egin dizkio bai Laresi eta
baita Adegiri ere. Diputazioa prest azaldu da, egoitza baikotzeko diru-partida
bat luzatu eta langileen lan-baldintzak hobetzeko baina ez dute onartu eta
Espainiar Estatuak ezarri nahi dituen lan-erreformen alde daude. Bestetik gaude
gu, eta gu bezala beste zortedun batzuk. Soraluzeko egoitza Fundazio batek
kudeatzen du eta gogotsu jaso du Gipuzkoako Foru Aldundiak luzatutako proposamena.
Langile guztien lan-baldintzak parekoak eta duinak izan behar direla uste dugu
eta hori lortze bidean, Gipuzkoako hitzarmen kolektiboa sinatzea ezinbestekoa
da.
Zein urrats emango dituzue horretarako?
Greba Egunak zehaztuta daude eta gizarte presioa ezinbestekoa
da. Diputazioak egindako proposamena onartzen ez duten egoitzetan
elkarretaratzeak egingo ditugu eta Grebetan ere gero eta langile gehiago bat egitea espero dugu. Azken finean, denok batera, hitzarmen bakarrarekin
indar gehiago izango dugu. Gipuzkoako langile guztiok merezi dugu bizi eta lan
baldintza duin eta parekoetan aritzea.
Aitxitxa eta amamak dira, azken finean, kaltetu
zuzenak. Zer diote eurek?
Argi dago zerbait igartzen dutela baina langile bezala, profesionaltasuna dago guztiaren aurretik eta inondik inora ez zaie arazoaren errudun egiten. Greba Eguna izan edo ez, egoiliarrak primeran daude zainduta eta aurrerantzean ere, geratzen dena gertatuta, eurekiko tratua zuzena, errespetuzkoa eta duintasunez betea izaten jarraituko du.
Hitzarmena sinatzen
{mosimage}Atzo sinatu zuten ELA, LAB eta UGT sindikatuek Soraluzeko Fundazioarekin aurre-hitzarmena.