Soraluzen bertsoekiko zaletasun handia dagoela argi geratu zen, beste behin, Joan den barixakuan. VII. Plazatik Gaztetxera txapelketako kanporaketak jende andana batu zuen gaztetxean; 60 lagun elkartu ziren afaltzeko eta beste hainbeste gerturatu ziren bertso saioa entzutera. Gaztetxea jendez lepo zela ekin zioten bertsoak kantatzeari.
Umore ona nagusi, bertan aritu ziren Eneko Beretxinaga soraluzetarra eta Maddi Gallastegi; Paula Amilburu eta Maddi Ane Txoperena; Ander Elortegi eta Jon Arano eta Malen Amenabar eta Txaber Ormazabal. Unai Soraluze Toganok jarri zituen gaiak eta fin bete zuen gai-jartzaile papera, gai serio eta umoretsuak tartekatuta, saio interesgarria taularatu zuen.
Beretxinaga eta Gallastegi, publikoaren faborito
Bertsolariak zortziko txikian hasi ziren kantuan eta zortziko handian gero. Ostean koplatan aritu ziren eta saioaren lehenengo zatiari bukaera emateko bakarka. Lehen zatia beteta, Ander Elortegik eta Jon Aranok jaso zituzten epaileen puntuak. Entzuleek ordea, nahiago izan zituzten Eneko Beretxinaga eta Maddi Gallastegi. Beraz, buruz-burukoa jokatu eta Elortegi eta Arano nagusitu ziren; 189,5 punturekin finalerdietarako zuzenean sailkatuta.
Sari banaketaren ondoren, txalo artean laga zuten bertsolariek oholtza eta gau giro apartaz disfrutatzeko aukera paregabea izan zuten gaztetxera hurbildu zirenak.
Soraluzeko puntuazioa horrela geratu zen:
Ander Elortegi eta Jon Arano 189,5 (Finalerdietarako sailkatuta)
Malen Amenabar eta Txaber Ormazabal 184,3
Paula Amilburu eta Maddi Ane Txoperena 182,5
Maddi Gallastegi eta Eneko Beretxinaga 168,5
Azken kanporaketa Eibarren
Barixakuan, afalostean jokatuko da azken kanporaketa Eibarko gaztetxean. 19:00etan triki-poteoari ekingo diote eta 20:30ean izango da afaria. Tiketak 5 eurotan daude salgai, Depor, Karrika, Buenos Aires eta Manuel tabernetan.
Saioan lehiatuko diren bertsolariak:
Ion Mikel Mugika eta Aimar Goenaga
Odei Irigoien eta Imanol Lizarazu
Ander Elortegi eta Jon Arana
Oihana Iguaran eta Unai Mendizabal
{mosimage}
{mosimage}
{mosimage}
{mosimage}
{mosimage}
{mosimage}