Egindakoa lanarekin gustora daude asanblada-kideak. Urte asko daramatzate jardunaldiok antolatzen eta asanbladako kideak adin eta gustu guztientzako ekintzak eskaintzen saiatu dira. Hor kokatu dute umeentzako jostailu tailerra eta antzerkia, eta jasotako erantzun ona ikusita, "halakoak egiten jarraituko" dutela diote.
Gabonetako testuinguruan egin zuten baita "Tripafesta" afari beganoa: "ospakizunek dakarten betekaden atarian, tripa festak elikagai osasuntsuekin, gehiegikeriarik gabe, otordu ederra dastatzeko parada eman zigun" diote. Tripafestak hileko azken barixakuetan eskaintzen jarraituko dute.
Bertso-merienda "gero eta arrakastatsuagoa"
Urte hasieran izan zen bertso saioa ikustera jende andan hurbildu zen. Euren hitzetan "gero eta arrakasta haundiagoa" izaten ari da eta hurrengo urteetan bertso meriendak errepikatuko direla hitz eman dute.
Historia osatzen jarraitzeko asmoa
Gaztetxearen historia batzeko egindako tertuliak "oso aberasgarritzat" jo dituzte gazteek. Aurrerantzean informazioa jasotzen jarraituko dute bertako historia, osatzen joateko. Honen harira, bertan jorratutako gai interesgarri batzuk berreskuratu nahi dituzte, besteak beste, SOTA, Karakateko antena, Eibar-Gasteiz edo haize erroten gaia.
Arteari helduz, "Irudimena landuz" erakusketak bederatzi lagunen lanak batu ditu, marrazkiak, margolanak, collageak, argazkiak...;
"Hipopresioa" zer den ere ikasi zuten eta baita jostailu erotiko originala egiten ere, tabuak hautsi eta gaiaz naturaltasunez hitz eginez: "Markatzen zaizkigun ereduak ezbaian jarriz, sexuaz gozatu eta bestelako ereduak ezagutu ditugu".