Euriteengatik ibaia garbitzeko saioa atzeratu eta gero, bihar izango da horretarako eguna. Goizeko 10.00etan batuko dira boluntarioak kontzejupean, Soraluzen 45 lagunek eman dute izena.
Arduradunek garbiketa saioaren helburuak eta lan-plangintza zein den azalduko dute eta gero garbitzeari ekingo diote.
Garbiketa 12.30 bitartean egingo dute eta Deba ibaia Soraluzetik igarotzen den tartean pilatutako zaborra jasotzea izango dute helburu. Hasiera batean, jasotako zaborra Plazan pilatzea zuten asmoa, baina azkenean edukiontzietara botatzea adostu dute. Ostean, mokadutxoa emango zaie parte hartzaileei.
Segurtasun neurriak hartu eta betetze aldera, izena eman duten boluntario guztiek asegurua egina dute.
Mendiko GPSa eta Flyschera bisita zozketan
Biharko ekitaldiarekin natur balioekiko sentsibilizazioa bultzatu nahi da herritarrengan, ibaiak benetan gordetzen duen zaborra begi bistan ipiniz eta gure ibaiak
garbi mantentzeko kontzientzia sortuaz.
Ekimen hau Debegesak bultzatutako "Ibai-lagun" programaren barruan dago. Programa honek bi ildo ditu, batetik, ibaiko espezie inbaditzaileak identifikatu eta ezabatzea. Bestetik, Deba eta Ego ibaien garbiketa lanak egitea.