Atzoko udalbatzarrean 2011ko aurrekontuak bozkatu eta onartu zituzten Udal Gobernu Taldearen aldeko 5 botu,
EAJ-ren abstentzioa eta PSE-EE alderdiaren kontrako botuekin (PP-ko ordezkaria ez zen azaldu). Aurten 400.000 euro gutxiago izango
ditu udalak herriko proiektuak kudeatzeko.
![plenoa_danak.jpg plenoa_danak.jpg](images/stories/2011/apirila/plenoa_danak.jpg)
Iker Aldazabalek alkateari gogoratu
zion bigarrenez euren “alderdiari esker” onartu direla
aurrekontuak. Botu azalpenean esan zuen egoera ekonomikoak kezkatuta
eta euren taldeak eginiko haurreskolarako partida onartu delako
abstenitu direla. Udal Gobernu Taldeari bere legealdian agindutako proiektuak ez bete izana leporatu zion, gaztetxokoa, kultur etxea eta eguneko zentrua aipatu zituen adibidetzat.
Alkateari "zorionak" eman zizkion, aurrekontuak apirilean aurkeztuta "errekorra" egin duela esanez. Bukatzeko, "gaitasun urria eta kudeaketa kaxkarra" egitea leporatu zien aginteko zinegotziei, "zuen benetako aurpegia erakutsi duzue. Maiatzean herritarrek erabakiko dute".
![plenoa2.jpg plenoa2.jpg](images/stories/2011/apirila/plenoa2.jpg)
Patricia Borinagak argitu zuen diru partiden
banaketa ezberdina izan zitekeelako ezetz bozkatu dutela
eta “behintzat” Udal Gobernu Taldeak onartu duela eurek
aurkeztutako haurreskolarako diru partida. Alabaina, aurreko egunetan moduan, kritikatu egin zuen udalak eginiko dirulaguntzen banaketa.
![plenoa3.jpg plenoa3.jpg](images/stories/2011/apirila/plenoa3.jpg)
Jose Luis Arizaga alkateak ezer baino lehen EAJ-ri eskerrak eman zizkion aurrekontuak onartzea ahalbidetzeagatik. Oposizioak haurreskolarako partida bat
aurrekontuetan zehaztu ez izana kritikatu zuenez, alkateak
Partzuergoaren eta Jaurlaritzaren baietzaren zai zeudelako gertatu
zela azaldu zien zinegotziei. EAJ-ri onartu zion proiektu gehienak kanpoko laguntzei esker egingo direla eta legealdian aurreikusita zeuden proeiktu asko ez direla egin bideragarriak ez zirelako.
"Errekorraren" gainean, aurrekontuak borobiltzea "benetan kostatu" zaiela esan zuen, "neurri gogorrak hartu behar izan ditugu, ariketa potenteak egin ditugu aurrekontuak hona ekarri ahal izateko". Bukatzeko esan zuen, baliabiderik eduki ez arren, lana eta aldaketa "nabarmenak" egin direla herrian, eta maiatzean ikusiko dela herritarren hautua zein den.
Haurreskola haunditzea
matrikulazioen araberakoa
Horren harira, beste behin, Soraluzen haurreskola
eskatzen diharduten eta haurdun dauden amak agertu ziren
saio aretora, haurreskola noizko egongo den jakinminez, “iraila
segituan datorrela” eta.
Alkateak azaldu zuen egindako
galdeketen arabera irailera bitartean nahikoa plaza badaudela oraingo
haurreskolan (22k eskatu zuten plaza), baina maiatzeko
matrikulazioetan ikusiko dela gurasoen benetako asmoa zein den eta
ondorioz, irailerako azpiegiturak haunditzeko beharrik egongo den.
16.000 euro daude zehaztuta haurreskola azpiegituretara, eta diru
gehiago behar balitz kreditu aldaketa bat egitea aurreikusiko dutela
esan zuen alkateak.