Azken urteotan egin izan den moduan, euskararen suaren bueltan egingo da ospakizuna. Ostean jan-edana izango da eta 21:00etan "Gure sorlekuaren bila" filma, euskaraz grabatuta ezagutzen den lehena, proiektatuko dute antzokian. Dokumental estiloko filma hau 1956an estreinatu zuten Hazparnen. Handik gutxira desagertu egin zen eta 60 urte beranduago, unibertsitateko ikerlari gazte batek, Iosu Martinezek, topatu du.
Hurrengo egunean "Erdaldun berrien kluba" antzezlana eskeiniko dute antzokian. Istorioko protagonista Irantzu da; euskaraz pentsatzen, sentitzen eta, ahal duen guztietan, euskaraz diharduen neska eskoriatzar bat. Horrek hamaika arazo sortuko dizkio egunerokotasunean.
Erabili, bizi, erabizi
Erabili, bizi, erabizi da Euskal Herriko Euskaltzaleen Topaguneak aurtengo Euskararen nazioarteko egunerako aukeratu duen leloa, erabilera eta bizitza uztartzen dituena. Beraz, aurten, euskalzaleek Euskarak 365 egun dituela esatearekin batera, euskara erabili eta euskaraz bizi; erabizi ere esango dute. "Erabizitzea da hitz egin, berba egin, solastu, mintzatzea etxetik plazara eta plazatik etxera eraman eta ekartzea sentitzen dudana eta sentitzen dudan moduan esatea ". Horrela hasten da Euskararen egunerako prestatu duten manifestua.
