Ohartarazi zuen ustelkeria nagusi dela eta gobernuz kanpoko erakundeetatik bidaltzen den dirua apenas heltzen dela, "aurrez gobernuaren eskuetatik pasatzen baita". Misiolarien bitartez bidaltzen den dirua berriz zuzenean heltzen dela eta hainbat egitasmo martxan jartzeko balio izan duela aipatu zuen. Soraluzeko misio taldearen bitartez bidali izan den diruarekin jendea 24 orduz artatzen duen osasun arreta-gunea eraiki dutela jakinarazi zuen: "gainerakoan, osasun langileek grebak egin behar izaten dituzte ordaintzen ez dietelako".
Herrialdeak kanpoan bizi diren haitiarrek bidaltzen duten diruari esker egiten ei du aurrera. Domeka honetan presidentea aukeratzeko hauteskundeak egin dituzte eta hamar egun barru jakingo da datozen urteetan zeinek gobernatuko duen bertan. Berrogeita bost hautagaik aurkeztu dute euren burua presidente izateko.
