Zapatu eguerdian Diablues & Bluezifer taldeak Bergarako Bluesa ekarriko du Plaza Barrira

Deablus & Bluezifer Band 2024an sortu zuten Bergara, blues akustikoarekiko pasioak batuta. Taldeak bi kultura fusionatzen ditu: Euskal kulturako kantu tradizionalak eta Blues afroamerikarra. Bergararrek bluesaren sustrai sakonetaraino eramaten dute entzulea, Mississippiko doinu zaharrei ukitu pertsonala emanez. Blues akustikoaren instrumentazio tipikoa erabiltzeaz gain, ahots jokoak, Dobroa eta tronpeta bezalako doinu eta instrumentu bereziekin apaintzen dute beraien ezohiko soinua.

Azken aldian laukote bezala dihardute. Taldekideak ondorengoak dira: Mikel Etxeberria (Aho-soinua, gitarra eta ahotsa), Asier Elorza (Ahotsa, gitarra, dobroa, aho soinua eta tronpeta), Nagore Sanz (Kontrabaxua eta baxua) eta Aitor Aranburu (Perkusioa). 

Eskarmentu handiko taldea

Taldeak jaialdi garrantzitsuetan parte hartu du, hala nola, Hondarribia Blues jaialdia, Donostiako Jazzaldia, eta Tolosa eta Arrasateko Blues jaialdiak. 2016an, “Discovers” izeneko diskoa argitaratu zuten, eta 2021ean “Gure urdina” izenarekin 2. diskoa. Gainera, Bluesaren sustraiak eta bilakaera azalduz kontzertu didaktikoak ere egiten dituzte , Guggenheim museoan, Bilboko Blues jaialdiaren barruan eman dituztenak adibidez.

2016an, “Discovers” izeneko diskoa argitaratu zuten, eta 2021ean "Gure urdina" izenarekin 2. diskoa.

'Bideak' proiektua

Emanaldi hau Gaztelupe Hotsak-ek Soraluzen garatzen diharduen Bideak proiektuaren baitan kokatzen da, zeinak kultur adierazpen garaikideak eta tokiko komunitatearen partaidetza uztartu nahi dituen, inprobisazioaren bidez esperientzia interesgarriak eskainiz.

Helburu nagusia da kultura arloko berrikuntza, ikerketa eta bitartekaritza sustatzea. Saioak diziplina ezberdinak uztartuko ditu eta herriko eragileek parte hartuko dute. 75-90 minutu bitarteko iraupena izango du eta oraingoan herriko plazan egingo da.