Aurrera doaz Baltegietako kalea berritzeko lanak. Echaide enpresako obra-buru Alvaro Garciak esandakoaren arabera, uste baino gehiago altxatu behar izan dute galtzadapea, baina dagoeneko saneatu dute zubi berritik errepiderainoko tartea.
Emandako xehetasunen arabera, egunotan, URA Agentziak aldatu duen hoditeriarekin lotutako lanak bukatzen ari dira. Hain justu, SAPAko autobus geltoki inguruko espaloian juntura lanak egiten ari dira. Behin horiek bukatuta, hormigoiz estaliko dute zorua, gero haren gainean berriro ere galtzada-harriak jarri ahal izateko.
Laster, lehen zatian
Garcia obra-buruak esplikatu duenez, hori egin aurretik, kalearen lehen zatiko galtzada-harriak kendu eta hango zoru zatia saneatuko dute. Han ere hormigoia botako dute gero, eta, kale osoa gertu dagoenean, batera jarriko dituzte galtzada-harri guztiak berriro ere, kale osoan, 650 bat metro karratu da kale zati hori.
Hori horrela, Garciak jakinarazi du datozen egunotan hasiko direla falta den kale zatiaren galtzada-harriak kentzen. Eguna zehaztean, jakinaraziko diete hango garajedunei, hormigoia bota bitartean, ezin izango baitituzte autoak sartu edo atera garajeetatik.