Iaz moduan, bluesaren izarrekin antzokiak bete aurreko asteburuan, mendian hasiko da 2025ko Blues Hotsak Jaialdia, domeka honetan.
Hitzordu bikoitza antolatu dute horretarako. Batetik, Dolmenen Ibilbidera doako bisita gidatua egingo dute, Begibistan enpresako gidariak gidatuta. 09:30ean, Karakatetik abiatu eta Irukurutzetara joan-etorria egingo dute, bidean dauden balio arkeologiko handiko guneen eta elementuen gaineko azalpenak emanez.
Amaieran hamaiketakoa
25 laguneko taldeak parte hartu ahal izango du bertan eta gaur, eguaztena, 12 lagunek emanda zuen izena. Hala ere, oraindik bada izena emateko aukera. Horretarako HEMEN KLIKATUTA dagoen formularioa bete beharra dago. Debegesako Turismo Bulegotik esandakoaren arabera, izena eman dutenek barikuan jasoko dute konfirmazioa. Gaineratu dute komeni dela ibilbidera jantzi aproposak eta ura eramatea. Behin bisita amaituta, hamaiketakoa eskainiko da parte hartzaileentzat Plaza Zaharreko karpan.
Zuhaitz landaketa
Bestetik, Baso Biziak elkartearen eta Lurgaia Fundazioaren gidaritzapean, denboraldiko lehen zuhaitz landaketa egingo dute. Gaztanondon (Sagar Erreka) egingo dute; domekan, azaroaren 16an, 09:30ean abiatuko dira Gol lantegiko aparkalekutik. Izena biharko, azaroaren 13rako eman beharra dago, mezua bidalita honako helbidera: soraluzekobasobiziak@gmail.com.
Domekakoa borobiltzeko, 13:00etan, kontzertu-dantzaldia izango da plazan, Arrasateko Erromintxelak swing taldearen eskutik.
Swing-a goi mailako musikarien eskutik
Maila altuko eta eskarmentu luzeko musikariak dituen taldea da Erromintxelak. Jon Garcia (De Val, Tatta-Denso) ahots eta gitarrarekin, Iñigo Zubizarreta (Soziedad Alkoholica, Governors, Tako) manux gitarrarekin, Jokin Vitoria (Los Galerna, Ze Esatek!, Arima Soul) bateriarekin, asanboardekin eta perkusioarekin, Aitor Moreno (EIJO, Spolem Girls, Los Galerna) kontrabaxuarekin, Daniel Apodaka biolinarekin eta Andoni Aizpuru (Crazy Jazzers eta Div@s of Soul) saxo tenorrarekin.
Bideoan ikusten den moduan, swing musika interpretatzen dute maisuki, euskarara ekarri dute hura eta dantzari ere gogotik ematen diote taula gainean.